政壇：卓永興防暑騷顧住抖涼
近年嚟政府積極推廣職業安全健康運動，但係通常講多過做。尋日職業安全健康局聯同勞工處等多個部門以預防中暑為題，喺金紫荊廣場一早同成大班工人做早操，話做足熱身可以避免施工受傷咁話喎！大會又大派水樽及散熱貼等防暑用品，呼籲工友多飲水，避免暴曬。唔知係咪要呼應番防暑主題，要啲工人喺烈日當空下曬足個幾鐘，唔通真係要有工人曬到暈至安樂？
勞工處處長卓永興同職安局主席黃天祥都有出席開幕儀式，兩個人做完早操當然要做吓騷啦！影吓相、寒暄吓嘅門面功夫梗係唔少得。不過口口聲聲要推廣防暑，但表現就閃閃縮縮。記者想佢哋向大眾呼籲防暑措施，但佢哋竟然多次透過公關以「有事做」婉拒訪問，活動完咗仲「快閃」入室內涼冷氣。呢頭叫人戶外防暑，嗰頭自己入室內防暑，呢個真係好好嘅示範喎！
卓永興一做完騷，就「快閃」走入室內防暑。
幾百名工人進行熱身操，避免施工時受傷。