政壇：大舊拉布曾鈺成做B隊

立法會主席有權唔畀議員提出一啲「瑣屑無聊」嘅修訂，但立法會主席曾鈺成就話，唔覺人民力量就立法會出缺安排條例草案提出嘅千三項修訂無聊，呢條條例係講緊應否剝削一個人嘅參選權，事關重大，絕對唔可以隨口一句毫無意義、瑣屑無聊，就唔畀議員討論咁話。有份提出千三條修訂嘅人民力量議員「大舊」陳偉業尋日就喺網上留言，話曾鈺成多年嚟係佢一個值得尊重嘅對手。曾鈺成幾時做咗大舊嘅戰友？

正當建制派議員一邊籌劃應對輪更表，一邊喺度鬧人力嘅修訂無聊之際，曾鈺成冇幫拖之餘，仲暗寸輪更制唔掂。其實呢位建仔前主席同建制派「分開走」都唔係第一次，嚟緊九月立法會選舉，佢就寧願獨戰港島，都唔想建仔嘅人加入佢名單，理由係佢政綱係角逐立法會主席喎。

而且佢早前講到下屆好可能係普選嘅特首選舉時，就話設高門檻去剔除眾望所歸嘅人參選，社會唔會接受，即係提醒有關方面唔好用篩選方法，篩走唔想見嘅人，同建制派嘅諗法好唔同。曾鈺成早前鼓吹大和解，企中間啲，啱o架嘞！