政壇：IT豪驚魔童挑機

九月立法會選舉就到，上屆贏得好險嘅資訊及科技界「IT豪」譚偉豪，近日都好勤力約見唔同業界團體，希望爭取連任。外界一直以為佢最大對手係業界票王、泛民主派嘅莫乃光，估唔到IT豪最怕原來唔係佢，反而係電訊魔童王維基。　　　　

IT界向來係變數極多嘅界別，近期都有風聲傳出，互聯網專業協會（iProA）會長鄧淑明蠢蠢欲動，有意出戰立法會。但有業界人士分析，鄧淑明就算出選勝算都唔高，因為西環已表明屬意IT豪，唔想建制派多過一個人出戰，分薄票源。

搞電視唔參選

但當然唔係全部建制派都聽西環支笛，好似魔童就係其一。舊年選委會選舉票王係莫乃光，但建制方面，魔童攞到千幾票排第四高，絕對唔弱。我哋問過IT豪，佢都承認如果魔童參選對佢有好大威脅，因為魔童知名度高，可以吸走唔少游離票，就算贏唔到，都會益咗莫乃光偷雞得米。不過，IT豪可以放心啦，因為我哋問過魔童，佢透過秘書話現階段打算集中火力搞免費電視，今屆立法會一定唔會參選。　　

除咗驚魔童外，IT豪仲諗緊之後可以同邊個黨合作，因為五散人已散散哋。外界傳佢入新民黨，佢就話唔會咁快決定住，等真係連任到至算喎！

不過我哋就知道，遲啲佢會跟新民黨同主席葉劉淑儀一齊去上海考察，唔知到時會唔會傾下入黨事宜呢？