政壇：政商定格：陳文綺慧聽《帝女花》火速撻着
上任東華主席個多月嘅Viola陳文綺慧，籌款新招不斷，頭炮係搵嚟粵劇名伶蓋鳴暉，六月七日喺重開嘅新光戲院演出《香銷十二美人樓》。喺尋日嘅記者會上，Viola自爆係粵劇迷，一齣《帝女花》，令佢同粵劇「撻着」。
原來做粵劇晚會籌委會主席嘅李鋈麟同Viola都係標準戲迷，李鋈麟自爆小時候經常喺爸爸嘅雜貨舖被迫聽粵曲，每次趁老竇走開送貨，就轉台聽「披頭四」，估唔到長大後反而成為戲迷，粵曲朗朗上口。
舖王鄧成波公子兼總理Jason鄧耀邦都嚟撐場，做咗兩任爸爸，Jason心知太太辛苦，已訂定大紮玫瑰，母親節當日代兩個囡囡送花。
陳文綺慧（右二）同李鋈麟（左二）搵嚟鳴芝聲劇團台柱蓋鳴暉（右一）同吳美英（左一）擔綱演出粵劇。
鄧耀邦花心思訂花，諗住畀太太一個驚喜。