政壇：建制派防流會恐漏底

立法會後日會繼續審議簡稱出缺安排嘅《二○一二立法會（修訂）條例草案》，為免重蹈流會覆轍，建制派將組成復仇者聯盟，醞釀採取「輪班制」，確保唔會唔夠人開會。不過呢招都可能隨時漏底，因為除咗建仔同工聯會會坐定定外、有立法會「四懶蟲」之稱嘅議員霍震霆、李國寶、詹培忠同劉皇發未必會配合。所以連立法會主席都唔睇好，話難度相當大咁話。

平時會議都唔見人

上個星期四審議出缺安排時流會，唔少市民批評班議員浪費公帑。建制派可能擔心臨近九月立法會選舉激起民憤，急急度橋以「輪班制」阻止流會。建仔葉國謙會負責收集三十七個建制派議員嘅時間表，以便實施「輪班制」，邊個唔得閒要離開議事廳就講低，安排其他人頂住先，確保一定夠法定人數開會。

工聯會議員KK黃國健就話，會號召建制派議員集中精神完成法案審議工作，上星期工聯會、建仔、富貴黨、經濟動力、五散人同旅遊界議員謝偉俊都有共識咁話。不過，KK都唔敢保證條橋一定得。

即使建制派出招實施「輪班制」亦隨時漏底，皆因霍震霆去咗倫敦已經趕唔切返嚟開會，平時有「三點不露」之稱嘅李國寶，同一向開會都出席率奇低嘅發叔等人又未必會乖乖地坐定定配合。連新民黨葉劉淑儀都咁啱要飛去美國出席囡囡嘅畢業禮，要下個星期先返。

所以就連立法會主席都話：「輪班制」實施嘅難度相當大，要視乎議員自己有幾大決心，而佢就認為唔樂觀。咁又係，平時開啲得幾個鐘嘅委員會會議都大把議員唔見人，何況今次玩「拉布」，要啲懶蟲坐定都真係幾難。