藥水臘味氾濫 奸商草菅人命

神州果然夠神，連黑心食品都神化過人，幾騎呢核突都有。煙熏臘味唔係用火熏烤，而係用藥水浸泡，你聽過未吖？

內地網友踢爆，市面臘肉臘腸問題多多，用劣質原料生產唔在講，最絕就係所謂煙熏臘味，竟然完全冇經柴火烘烤，只係用藥水浸出來。更得人驚係呢啲藥水同毒汁冇乜分別，成分包括胭脂紅等禁止用於未經烹煮肉類嘅染色料，食落肚唔止對人體有害，隨時影響上呼吸道，甚至可能導致兒童有過度活躍傾向，大人兒童皆不宜。

無良奸商為降低成本，低價收購病豬死豬，先浸亞硝酸鹽甚至農藥防腐，再浸煙熏液染色加味，跟手烘乾就搞掂。呢啲藥水臘味，長期食用簡直係慢性自殺，連員工見到自己產品都耍手擰頭唔敢食。咪以為淨係山寨作坊至會出蠱惑吖，連自稱通過質量安全認證嘅大企業，一樣照辦煮碗大賺黑心錢，問你驚未！

內地有毒食品氾濫成災，藥水臘味只係冰山一角嘅咋。呢，市面熱賣用來炮製紅燒肉嘅「肉寶王中王」，亦被踢爆含漂白所用嘅氯，食咗會令人上癮，過量服食會傷害人體組織，嚴重甚至可致細胞壞死、潰爛。

大家咪以為呢啲有毒食品唔關香港事吖，城門失火，殃及池魚，本港食品大部分來自內地，北上入貨更加係唔少食肆嘅指定動作，好似藥水臘肉咁，用肉眼根本難以分辨，防不勝防，殺入本港一啲都唔出奇o架。

食物安全危危乎，弊在食衞局局長周一嶽等高官渾渾噩噩，後知後覺，靠佢哋把關，隨時死得人多。嗱，近年三聚氰胺奶粉、孔雀石綠魚、蘇丹紅鴨蛋、農藥蔬菜、塑化劑等長驅直入，次次都係傳媒率先踢爆，當局先至賊過興兵，急急腳做啲表面工夫補鑊。

呢，審計署前排炮轟食安中心失職，抽檢食物標籤弄虛作假，淨係揀安全風險較低嘅大型連鎖超市做抽檢，根本反映唔到實際情況。所以話，旨意跛腳鴨政府為食品安全把關，等於問和尚借梳，盞嘥氣！

民以食為天，食以安為先。食品安全唔講得笑，內地食品信唔過，香港官僚靠唔住，太一叮都係嗰句，盡快叮走周一嶽，大家先至可望有啖安樂茶飯食！