SUN熱辣：靚貨肉質分明有燒酒香

內地黑心食品防不勝防，加料臘肉更難憑肉眼分辨。本港海味專家教路，要避免中招，並非絕無方法，可從「望聞問切」分辨臘肉的好壞。倘仍擔心購入問題臘肉，可自行在家曬製臘肉，製作過程簡單，確保好味又安全。

金城海味負責人林金城教路，消費者可從外觀、香味、肉質和價錢等，分出好壞臘肉。從外觀看，靚的臘肉脂肪與肉質會一節節分開，層次分明，而壞臘肉則脂肪與肉分層模糊。香味方面，靚臘肉有燒酒香味、豬油甘香，壞臘肉則帶臭油膉味；而優質臘肉售價八十至一百元一斤，若臘肉價錢低得離譜，例如賣二至三十元一斤，相信絕非好貨，隨時是黑心臘肉。最後靚臘肉，用手一觸，肉質實淨，至於壞肉則會霉爛及質感較差。

自家製話咁易

「即使啲臘肉睇上去好光澤、顏色好靚，但你唔知佢加咗啲咩去整，所以最好都係自己曬製。」食家徐蒝多年來均自行曬製臘肉，她說，曬製臘肉並不複雜，先用熱水將五花腩拖吓，灼一灼令豬肉定型，再用鹽、老抽、玫瑰露酒和糖醃肉。醃半日後，放在乾爽通風處，晾曬三日三夜。最後用抹手紙將臘肉包住，放入真空密實袋，存放冰箱內。待一、兩個月後，就可用來烹調。而自家製臘肉放在冰箱內，保存期可長達六個月。