政壇：政商定格：陳冉食晏洪綺敏充耳目
尋日下午一點食晏時間，喺中環舊政府總部西座皇后大道東出口見到候任辦公關主任Cathy洪綺敏喺門口四圍望，望咗一陣就離開，五分鐘後就見到呢期好紅嘅候任辦項目主任陳冉外出食飯，擺明就係Cathy幫陳冉睇水啦！
陳冉被爆唔係「三粒星」嘅永久居民兼入過共青團後，初出茅蘆就遇到咁大單嘢，難怪佢步步為營。之前記者經過舊政府總部遇到Cathy，佢話如果有記者喺度守候，陳冉點會落嚟吖！
陳冉落樓後行咗去對面嘅渣打銀行地庫一間海鮮酒家，原來佢約咗兩位男性友人食晏。可能佢以為出門口唔見記者就好放心，所以一見到記者就顯得有啲愕然，反問：「點解你會知道我喺度嘅？」趁機問佢變成紅人後有冇壓力、七一後會唔會繼續幫CY手？佢笑而不語。
洪綺敏行出西座門口四圍望咗一陣先至敢去食飯。
陳冉驚訝自己行程外洩，對一切問題笑而不語。