政壇：搞搞政：大輝炒冷飯李慧琼獨撐
立法會議員林大輝尋日喺佢今屆任期內提出最後一次質詢，大嘆業界發展近年愈趨困苦，又再問《稅務條例》第卅九（E）有冇窒礙港資企業喺內地升級轉型嘅意欲。
呢個問題都講到殘，所以當大輝問完之後，都冇乜議員有意欲提出補充質詢，唯獨建仔副主席李慧琼畀大輝嘅做法感動，決定幫佢手質問政府點樣幫啲中小企。有人欣賞，相信大輝都有啲安慰。
跟住商務及經濟發展局局長蘇錦樑嘅回應，都係講番政府關注中小企同現有措施等，又話會致力幫中小企進行業務轉型。大輝聽到後大鬧政府嘅回覆冇料到，又話官員嘅講法同炒冷飯冇分別。但係，大輝喺呢屆會期內就卅九（E）問咗不下十次，佢又何嘗唔係炒冷飯呢？
設計圖片