政壇：建仔新社聯爆新東卡位戰

近年建仔為發展得罪唔少人，特別係該黨部分領導層愈來愈剛愎自用，唔理他人意見，好似該黨副主席劉江華屬意嫡系人物、沙田區議員EQ葛珮帆領軍出戰新界東，加埋現任立法會議員陳克勤，務求保住兩席。不過，近日新界東地區有傳話該黨內部冇人肯排EQ條隊抬轎，仲有聲音希望力推新界社團聯會（新社聯）理事長陳勇取而代之，當中原來又係利益作怪。

消息人士話，陳勇已開始同EQ比併，雖然最終未必如願，但如果唔畀佢試嘅話，相信好多兄弟都唔甘心。消息又話只要公平遴選，即使最後仍係由EQ出選都冇所謂，至少向新社聯內部都好交代咁話。到底建仔會否從善如流，好快會有分曉。

講開又講，新社聯聽日同候任特首梁振英會面，據聞席間會力推成員之一嘅建仔北區區議會「票王」劉國勳加入政府。至於點解佢哋咁把炮可以唔使理建仔嘅遴選結果，消息人士就講咗句：「都要睇睇個組織夠唔夠力嘅！」真係盡在不言中。