政壇：蜘蛛女詠春籌款撐婦權
有「蜘蛛女」之稱嘅Lisa鄭麗莎喺上周六晚蟬聯包山后寶座後，翌日即為本月十九號舉行嘅國際培幼會「愛．女孩」籌款晚會表演綵排。擔任愛心大使嘅Lisa，當日同鮮魚行學校學生一齊練習詠春，仲特登喺長洲帶咗啲造型可愛嘅平安包鎖匙扣送畀同學仔做獎勵，氹到大家好開心。
當日見Lisa好有耐性咁幫同學仔執正詠春嘅姿勢，又親身示範唔同嘅拳法。對於同學仔咁積極投入綵排，佢都話好感動，希望今次表演可以籌募更多經費，幫助中國、巴基斯坦同非洲加納等地嘅婦女改善生活，爭取權益。佢仲透露當晚會有個神秘表演添！
