政壇：建制派禁拉布齋噏

人民力量嘅立法會議員陳偉業、黃毓民同個別泛民主派議員，尋日喺立法會審議改頭換面嘅替補機制時，採取拉布策略，玩到建制派謝晒，個個都冇晒心機。

議事規則委員會主席譚耀宗尋日好勞氣，話下個禮拜二會開會，檢討現行議事規則，但佢都好老實話諗唔到有乜方法阻止議員拉布，希望其他議員畀吓意見。就連內務委員會主席劉健儀亦加把口，話擔心再係咁拉布，好多重要議題都要被迫押後，已經請秘書處參考吓其他國家嘅議會規則，研究對抗議員拉布嘅方法。

譚SIR尋日話泛民成日都以「法定人數不足」呢招拉布，搞到好多建制派議員飯又唔敢食，廁所都唔敢去，所以建制派先係被壓迫嘅一群。議事規則委員會應該諗諗辦法，杜絕呢種拉布方式。

分組點票難過關

咁泛民主派以後咪冇得再拉布囉？當然唔係啦！因為議事規則久唔久都會有古怪建議，但每次都係無米粥。由於議事規則委員會任何動議都需要分組點票，如果泛民企硬，建制派好難硬闖。

觀乎近年，唯一能夠通過就係上次建議委員會主席有權趕委員離場，但當時過到係因為有白鴿黨支持。而之前好多次動議都係唔通過，好似有建制派議員曾經建議，將施政報告的致謝動議改為「察悉」動議，最後都被否決，從此可見冇泛民支持，議事規則冇可能修改得到。

其實建制派有冇諗過，點解泛民要拉布先，如果無端端拉布，市民都唔鍾意啦，如果市民唔喜歡拉布，自然唔投票支持佢哋啦，建制派使乜咁擔心，仲搶住要禁拉布啫？