又有酒店鬧火警 港府小心燒後欄

嘩嘩嘩，五星級酒店凌晨起火，職員倉皇逃難……大家咪以為太一叮報舊料呀，唔係講緊北角海逸君綽酒店嗰場三級火，尋日真係再有五星級酒店發生火警。酒店接連失火，呢個「五一黃金周」酒店業唔慌唔熱火朝天囉，叮！

今次起火嘅係尖東海景嘉福酒店，樓高十八層，凌晨地庫電話機房懷疑短路冒煙起火，職員報警求救。雖然事件並無造成人命傷亡，但係火燭期間全幢酒店大停電，照明燈熄滅，冷氣同升降機停頓。數名返回酒店嘅住客更加要喺大堂等候，有房歸不得，情景狼狽。

講起都奇怪，五星級酒店好似火燒連環船咁接連出事。日前祝融光顧海逸君綽，已經搞到超過千名住客上演「火海逃難記」，家陣又嚟一單海景嘉福失火大停電。呢一幕幕情景，呢一把把火光，簡直就係為五一黃金周贈興。

人哋話火燒旺地，酒店相繼失火，絕對唔係旅遊業興旺嘅預兆，反而係一個警號。大家知啦，港府發展旅遊業坐而論道，酒店房間長期緊張，遊客一房難求，本來已經一肚火。如果以貴租撲得一個房間，居然搞到好似劏房居民咁，要擔驚受怕變火燭鬼，香港塊「旅遊之都」招牌睇怕都燒得咯。

退一步講吖，酒店失驚無神火燭，就算冇搞出人命，搞到遊客流落街頭吊吊揈，都已經夠晒丟架，夠晒趕客啦！

不過話時話，酒店一而再發生火警，太一叮唔覺得奇怪喎。海逸君綽火燭之後，被揭走火通道同避火層放置雜物，但係消防處三年來巡查酒店三十二次全無發現。點解呀？原來消防處聰明笨伯到餐餐都先同酒店「預約」，並唔係突擊巡查，簡直係超級大笑話。以當局呢種虛有其表嘅巡查工作，酒店火警冇釀成死傷枕藉，算行運嘞。

叮佢個鎯鎯，講到呢度，大家係咪一額汗呢？未算呀，五星級酒店都火警隱患四伏，其他無牌經營嘅山寨賓館就更加牙煙，港府坐視無牌賓館開到成行成市，簡直就係靠害。

好心啦，曾蔭權，你公帑遊埠就識得住總統套房，對遊客住宿安全就闊佬懶理。港府漠視酒店消防隱患，縱容無牌賓館遍地開花，你哋遲早火燒後欄咋，叮！