SUN微博：打橫嚟講：七百萬港人的自由事

曾蔭權夕陽政府，當香港七百萬人全係傻仔，好恰啲！竟不理民意怒吼，想夾硬急急修訂那「網絡23條」的《版權（修訂）條例》，最恐怖兼悲哀的係，這樣關乎全港傳媒出版命脈、七百萬人言論自由的惡法，竟由兩條神級粉皮揸旗處理：一係廢到阿媽唔認得的商務及經濟發展局局長蘇錦樑；另一件是更低級卑劣的知識產權署署長張錦輝，此雙怪，可說是香港最新之恥（跟大貪官曾蔭權有得揮）。

上星期，聽收音機，前高官王永平做主持，佢苦口婆心勸張錦輝粉皮精不要倉卒行事，被張一口拒絕；王永平又勸佢不如傾掂版權豁免先作「二讀三讀」，那粉皮精亦惡言反對，一介無彎轉之強權壓頂，還騙人說，要《修訂》通過後才再談豁免喎！吓！你信得過嗎？佢話從來都未行使過此例抓人，即時被質詢咁不代表將來唔拉人喎！死鏟只有口啞啞！

此「網絡23條」很恐怖，例如含糊不清的說要有「超乎輕微的經濟損害」，才去告人，大佬！何謂「超乎輕微」呀？話事權全在一群兇狠無知的低能兒手上，而且，就算「原創人」不提檢控，香港政府皆可自行入屋拉人，仲係「刑事」嗰隻，擺到明係政治打壓行為啦！如果將來有老師叫小學生運用創意重寫「狼來了」故事，唔知會不會，伊索唔理，反而禿鷹嚟拉人呢？

振英哥曾撲出一錘定音，搞掂雙非孕婦，依家為何不出一句良心話，幫幫七百萬人？

彭志銘

次文化考古學家，對城中潮語有深入研究，博徵博引，廢官廢人行埋一邊。

email：sunweibo@opg.com.hk

「就係敢爆」網址tv.on.cc/hot