政壇：政商定格：攞命陳浮薪加三成半超高

金管局尋日年報披露高層人工，總裁「攞命陳」陳德霖份人工加幅超靚，浮動薪酬加咗超過三成半，乜唔係話浮動薪酬係睇外匯基金表現做人嘅咩？外匯基金投資表現增長邊有咁多，即係兩者脫咗鈎啦！

年報顯示總裁舊年固定薪酬係600萬元齊頭，浮動薪酬203.8萬元，其他福利（包括公積金、醫療、保險、年內累積年假）就有100萬元，總數係903.8萬元。

根據慣例，攞命陳舊年份人工，其實係反映緊二○一○年嘅工作表現，就算扣除其他福利，佢固定加浮動總薪酬升幅都有7.1%，一樣跑贏大市。金管局發言人就話，攞命陳筆浮動薪酬係根據表現，由財政司司長參考外匯基金諮詢委員會轄下管治委員會建議審批。外匯基金舊年嘅投資回報率係1.1%，明年呢個時候嘅金管局年報，大家可以再睇吓，管治委員會究竟畀總裁幾多花紅，到時又會唔會脫鈎o架？