政壇：周一鑊7.1「無限期」休假
下屆政府正在組班，咁啱工聯會尋日舉行慶祝勞動節酒會，好多現任官員都有現身，但大部分都封嘴以免講多錯多。反而食物及衞生局局長周一嶽就反其道而行，問佢七一會做乜嘢時，佢竟然「玩嘢」話會放假，隨即惹來無限聯想。咁問佢放假放幾耐，佢就話「唔知」，其後疑似補鑊話當日係公眾假期，甚至話自己平時都係早上六點幾起身喎，認真無厘頭。
同場嘅仲有盛傳會接替俞宗怡出任公務員事務局局長嘅常秘黃鴻超，被問到若獲邀出任局長會否接受，佢直言「唔答」，又笑笑口話「唔好問，好快就知」，千祈唔好寫佢講嘅任何嘢喎。另外，政圈盛傳平機會主席林煥光有機會出任副政務司司長，工聯會榮譽會長陳婉嫻直言係佢哋鍾意嘅官員喎！