政壇：CY回請飯局隨時AA制
喺特首選舉落幕後，候任特首CY梁振英喺上月同二十多名建制派議員喺中環中華總商會舉行「大和解」飯局後，據聞CY計劃喺本月十八日回請班建制派議員，飯局嘅地點巧合地再次喺中總舉行。
有知情人士話，一直對自己要求十分嚴謹嘅CY，對於呢個回請飯局都好上心，有人仲考慮到建制派議員本身係選委，認為要諮詢法律意見睇吓回請佢哋有冇問題，為咗安全起見，議員要有心理準備隨時要回復AA制夾錢喇！
另外，CY尋日同中港家庭權益會代表會面，懷疑出現溝通誤會。話說工黨主席李卓人早上爆料話，建仔主席譚耀宗有份出席呢次會面，質疑呢個做法係政治回報。候任辦發言人澄清話，原本都有諗過叫埋譚耀宗出席會面，但後來發現雙方已了解對方嘅睇法，所以無需要譚耀宗出席喎！
梁振英計劃回請建制派議員食飯，但屆時可能要AA制夾錢。（資料圖片）