政壇：反替補淹沒譚志源

夕陽政府早前硬推替補機制惡法，激發逾二十萬人上街反對，而政制及內地事務局局長譚志源事後終於跪低，將惡法改頭換面後，聽日就會攞上立法會大會恢復二讀辯論。

促泛民避席 毓民慢慢講

人民力量議員「大舊」陳偉業同黃毓民為咗抗衡替補惡法，早前提出咗一千三百幾條修訂，意圖阻慢惡法通過。有人統計過兩人接力十五分鐘發言，理論上最少可講到二百多個小時，換言之最少開二十日會議，如果用盡發言時間嘅話，會議時間可能高達六百多個小時添！

咁都未夠，為求玩謝條惡法同譚志源，大舊諗盡計仔。為咗每次修訂都言之有物，唔係重複又重複，講嚟講去都係三幅被，大舊尋日話會喺網上動員，邀請網民寫稿畀佢哋喺會上發言。咁又係嘅，網民嘅創意無限，意念源源不絕，大舊就唔使諗爆頭，班在座嘅議員就唔會悶到瞌眼瞓。

佢仲會鼓勵泛民主派議員到時發言，否則就避免出席喇，因為咁樣可以迫使多啲保守建制派要出席會議，否則會令人覺得泛民議員好似幫手通過呢條惡法咁喎。

如果要有效不間斷「拉布」發言，點樣養好把聲係關鍵，所以毓民屆時會以國務院總理溫家寶說話腔調慢慢講，有人甚至教佢哋到時含住粒冰嚟發言添！不過，毓民本身都好大犧牲，事關佢原本計劃喺周五做眼部手術，為咗反惡法已經將個手術改咗期，佢仲未知幾時先有得再做。

千方百計都係想否決條替補惡法，究竟呢個議會抗爭會唔會寫入史冊，聽日有分曉。