恐怖蟲蛋殺入港 港府坐視正笨蛋

「壞蛋」可以有兩個解釋。一個係講人嘅，好似曾蔭權咁，做「香港第一貪」都唔夠，仲要做埋「中環民國大總統」，公帑遊埠豪住總統套房，稱為貪腐貪婪恬不知恥官場超級大壞蛋，絕不為過。

至於壞蛋嘅另一個解釋，就係指變壞咗嘅禽蛋。壞蛋通常同煲呔曾一樣，外表扮到光潔無瑕，內裏係腐朽不堪，防不勝防。嗱，又有市民中招嘞，而且啲蛋唔止壞，仲有蟲添，幾核突呀，叮！

事情係咁嘅，有市民喺香港仔一間連鎖零售店購入三十隻盒裝雞蛋之後，一半放入膠盒，一半放入雪櫃。三日之後，打開膠盒一睇，幾乎想嘔，雞蛋孳生大量白色蛆蟲，並發出陣陣惡臭，令人毛骨悚然。存放喺雪櫃嘅雞蛋亦唔好得幾多，蛋白同蛋黃顏色異常混濁，而且呈啫喱狀同杰撻撻，有蛋漿更加黏住蛋殼未能流出，一睇就知有問題。

事件引起網民廣泛討論，有網民話，曾經喺相同店舖嘅其他分店買雞蛋，九成都係發霉，皮蛋同鹹蛋亦有問題。本報記者從該店舖同其他分店購入多盒雞蛋，發現均無列明出產地，當中部分雞蛋更加冇印上食用期限，盲嘅都睇得出乜嘢事。

官場壞蛋多因貪念而成，恐怖蟲蛋又點嚟嘅呢？咪又係貪出禍囉，業界估計，近年內地蛋價高企，所以內地有不法商人收集過期「剩蛋」，以平價出售畀香港零售商牟利。醫學界警告，壞蛋好可能會沾染大腸桿菌等惡菌，輕則引致腸胃炎，重則搞到身體脫水，後果真係可大可小o架！

雞蛋係市民最常用嘅食材，家陣壞蛋肆虐，市民食不安心。叮佢個鎯鎯，大家有冇發現，近年香港壞蛋特別多呀？早年蘇丹紅禽蛋襲港唔在講，就呢幾個月，內地黑心冰蛋嚟完，又到黑心血蛋，依家連恐怖蟲蛋都殺入香港，港府係點樣把關嘅呢？抑或係把關嘅根本一個二個都係笨蛋官僚，所以壞蛋至可以長驅直入冇有怕？

話時話，食衞局局長周一嶽如果唔係笨蛋，都係壞蛋，由蘇丹紅蛋到黑心冰蛋、血蛋，再到今次蟲蛋襲港，證明呢個世界果然係物以類聚，蛋蛋相衞！

港產官僚精嘅就快快做嘢，捉壞蛋，把好關。一來你哋同屋企人都係潛在壞蛋受害人，二來咯喎，市民向庸官掟雞蛋，如果隻隻係恐怖蟲蛋，你哋盞捉蟲o架咋，叮！