政壇：蔡加敏千金跆拳道防拐
呢排盛傳有拐子佬出沒，唔少家長都好擔心寶貝仔女出入嘅安全。佳寧娜飲食集團太子爺John馬鴻銘同太太「玩具大王」蔡志明千金Carmen蔡加敏尋日喺馬場捧潮州「家己冷」嘅團體馬「綠豆爽」，之後蔡加讚同爸爸蔡志明及媽媽蔡李惠莉亦來撐場。John坦言好擔心仔女嘅安全，會考慮請番個保鏢跟到實，仲畀仔女學跆拳道傍身添！
John同Carmen一向對大女靄翹同一對孖仔寵愛有加，對於傳聞有拐子佬光天化日拐走小朋友，兩夫婦都覺得好震驚同擔心。Carmen話囡囡去年入讀幼稚園，自己一向有送返學接放學，仲會教囡囡遇到陌生人要小心，依家考慮緊請保鏢。佢笑言有畀愛女學跆拳道，但囡囡只得三歲幾，暫時都係玩吓嘅啫！
馬鴻銘（右）同太太蔡加敏畀子女學跆拳道防拐子佬。
蔡加讚戴上名錶同黑超撐場，型格十足。