政壇：搞搞政：蔣麗芸整裝戰九西
喺建仔早前舉行路向營，之後突然爆出發展局政治助理張文韜「空降」立法會九龍西出選，佢哋嘅副主席Starry李慧琼就轉戰區議會超級議席，呢個建議一出惹來黨內反彈，為今之計，惟有變陣，派出有工商界背景嘅另一副主席Ann蔣麗芸落九西穩定軍心。
建仔九龍城支部尋日搞咗九西區巴士脫班調查記者會，盛傳會出戰九西嘅阿Ann同Starry「拍住上」，合作公布調查結果，明眼人一睇就知想幫阿Ann落九西做嘢打響頭炮。阿Ann話依家地區正醞釀參選名單，又提到自己舊年區會選舉都有幫九西同新東嘅兄弟，當場九龍城區議會副主席潘國華即時和應，話阿Ann喺選舉時好幫手喎！咁嘅格局，睇嚟阿Ann已經磨定刀準備開戰嘞！
設計圖片及對白