醫療事故鑊鑊甘 叮走庸官至放心

今時今日，醫療事故已經唔係新聞，好多人可能麻木晒。不過，當你睇過醫管局最新一期《風險通報》，包你眼界大開，目瞪口呆。

公立醫院舊年第四季嚴重醫療事故超過三十宗，可以講係無奇不有，做手術有嘢送，病人身體成為「雜物櫃」，呢啲例牌菜當然唔少得。嗱，睇吓今次又送啲乜？

有病人接受膀胱腫瘤切除手術，體內留低一截切除鏡膠嘴，醫生仲烏吓烏吓，直至病人喺手術後兩個月照X光先發現，卒之要捱多刀將異物攞番出嚟。其實，醫管局做手術大贈送，除咗膠嘴，連螺絲都有，問你服未！

醫護人員眼大睇過龍，留低手術用具喺病人體內不過係小兒科咋。最離譜嘅係，醫生左右不分，有病人原本要接受右邊腎臟輸尿管腎窺鏡檢查，醫生居然將腎窺鏡同導管插入佢左腎，講都冇人信。

咪以為左腎當右腎係小事吖，萬一輸尿管被刺穿引起感染，後果可大可小。呢次多得照X光及時發現出錯，先至冇造成嚴重後果咋，但醫生擺烏龍，病人嘅輸尿管已經受損，點都補唔番嘅喇。叮，做手術咁鬼兒戲，直頭攞病人條命較飛，唔驚就假！

話時話吖，呢類醫療事故，喺公立醫院見怪不怪咯，除咗左右腎唔識分，左右眼都可以搞錯o架。呢，有病人左眼做手術，醫生竟然將麻醉藥注射入佢右眼，公立醫院治病好似盲俠賣武咁，你話係咪靠害吖！

話到尾，公立醫院醫療事故層出不窮，打錯針、開錯藥、輸錯血、割錯器官、調錯屍、做手術左右不分等等，幾騎呢都有。上樑不正下樑歪，如果唔係食衞局局長周一嶽左右腦功能大兜亂，應做嘅唔做，唔應做嘅就亂嚟，點會搞到公立醫院七國咁亂吖，叮！

身為問責高官，周一嶽渾渾噩噩，「每周一鑊」，市民衣食住行、生老病死，統統畀佢搞到亂晒龍，雙非問題一鑊泡，醫療事故無奇不有，違規骨灰龕位遍地開花，食物安全問題無日無之，一句講晒，鑊鑊新鮮鑊鑊甘。

好彩夕陽政府時日無多，新政府就快上場，市民期望見到新人事、新作風，最想叮走嘅，睇怕都係做邊瓣衰邊瓣嘅周一鑊。民意昭昭，如果畀呢個尸位素餐嘅庸官繼續留任，盞佗衰下屆政府嘅咋！