SUN微博：噏乜論嘢：窮

“我都真係幾技窮，除咗窮我乜都唔識”

我曾經唔窮，就喺政府話我月入過萬係中產唔係貧窮階級嘅時候。當時我都算窮風流，有一個窮到得番錢嘅女朋友，直至地產代理提醒我冇400萬買唔起窮人恩物，我先知原來我連窮人都講唔上。愈窮愈見鬼，我之後識嘅人都係窮鬼。窮鬼聚埋一齊唯一嘅活動就係呻窮。「我就嚟窮死啦！」我個窮鬼friend大嗌。點知有一日佢真係窮窮下突然個人從中間爆開，啲窮手窮腳炸到一地都係，女朋友就好驚我有日都會窮死，係咁叫我脫貧脫窮，我話我係窮，但係我窮得嚟係中產！其實當時我已經窮到short咗唔知自己講緊乜，不過「窮中產」個名就好似尼古丁一樣有迷幻效果，女朋友即時冇再話我窮，連我自己都覺得自己冇咁窮囉。不過冇耐窮人飯堂大檸樂就打沉我，望住個50蚊燒鵝飯餐牌我真係覺得自己窮到去臨界點，嗰下忍唔住即刻買咗嚟食擺脫一下貧窮。我坐喺窮途末路一邊食燒鵝飯一邊喊，四大原罪「肥窮毒矮」齋中一樣已經死得，心諗我再喺咁同眼前班乞兒鬥窮落去真係死得，但係我都真係幾技窮，除咗窮我乜都唔識。法律面前窮人恒忍，雖然我已經窮乸到呢同坐監冇乜分別，但係掘我個窮鬼friend個墳呢啲嘢我真係做唔出，而且佢啲窮心窮腎都唔值錢。喺我好苦惱嘅時候窮神突然出現，係喎，我差啲唔記得窮人係有窮神射住。我大嗌「窮神你打救我啦」！窮神真係一拳打埋嚟將我打到去將軍澳，同時將我啲窮人DNA打晒出嚟。堆填區話我哋呢度唔收窮人㗎喎，我心諗你明明就係窮中產集中營仲喺度扮上菜，即時嬲到窮盡畢生嘅力一拳打爆咗個堆填區。窮中產集中營灰飛煙滅之後成個環境心曠神怡晒，當地窮人紛紛出嚟致謝，連窮神都對我拈花微笑，我當時先意識到原來我嘅真正身份唔係窮人，係窮神。