政壇：搞搞政：泛民臨選戰思唐唐

敵人唔可怕，可怕嘅係完美嘅敵人！泛民主派近排對呢句說話有好多體會，事關九月立法會選舉在即，泛民政黨已開始密密部署，貪腐形象入肉嘅煲呔曾本來係泛民掀動民眾情緒最佳嘅箭靶，但佢六月底就拜拜，民間怒火好難燒到九月投票，偏偏候任特首梁振英（CY）防守嚴密，潑水都唔沾身，搞到泛民政黨好頭痛，有人直言「好懷念」僭建地下王宮、爆行會機密等周身屎嘅前政務司司長唐唐，皆因咁易插嘅對手真係唔易搵！

九月九號立會選舉，泛民政黨勢藉七一大遊行造勢，不過想市民上街，都要有議題，CY當選咗成個月，泛民都捉唔到路，甚至有被反攻之勢。好似CY落區，社民連雖然都有踩場示威，但CY就主動走入示威者人群同社民連前主席陶君行等握手，搞到抗議變晒質；白鴿黨亦有相似經驗，佢哋呢頭鬧CY，嗰頭就被街坊鬧，為免炒作議題流失街坊選票，佢哋都要收手。

難怪泛民中人慨嘆，如果係唐唐當選就好喇！淨係婚外情、私生子同僭建地下王宮，醜聞都數唔晒、鬧唔盡，何況唐唐仲成日講錯嘢，唔憂冇議題啦！