政壇：黃洋達保參選權寧願坐監

人民力量尋日選出第二屆執委會，並就九月嘅立法會選舉排好陣，現任立會議員黃毓民繼續喺九龍西爭取連任，新西就會分拆兩張名單，包括現任議員陳偉業同區議員麥業成，九龍東就由外號「皇上」嘅黃洋達出戰。黃早前因衝擊替補機制論壇被判入獄三個禮拜，但獲准保釋外出等候上訴，不過，因應選舉嘅排陣，黃卻有提早坐監嘅打算，仲邀請同案被判入獄兩個月嘅社民連主席梁國雄（長毛）一齊入冊，但就畀長毛請佢食檸檬。

根據條例規定，參選人如果喺提名或者投票時咁啱上訴失敗坐緊監，依例就會喪失參選資格，為免上訴出問題，黃洋達打算下禮拜向法院申請放棄保釋即時入獄，等佢可以及早完成刑期報名參選。佢仲話，自從諗出自願入冊保參選權呢條「絕橋」後，曾經介紹過畀長毛參考，點知長毛就用冷淡嘅語氣話要諗吓先。

梗係啦！黃洋達刑期得三個禮拜，長毛就長達兩個月，而且一旦入冊就要剪短佢嘅照牌長髮，當然唔會同你一齊癲啦！