政壇：全國青聯南沙諗計助80後
匯聚唔少富二代嘅全國青聯，早排齊齊拉隊遠赴南沙「腦震盪」，呢一程由全國青聯副主席陳仲尼（Rock）同鄭志剛齊任團長，霍啟剛就帶頭贊助食宿，帶大家入住家族旗下嘅南沙酒店。南沙係霍家嘅發展基地，啟剛善盡東道主之誼，拉隊去參觀南沙遊艇會。
集思會為期兩日，今次同行有四十幾位「全青」兄弟，包括保良主席梁寶珠囡囡林玉茵（Maya）、百仁基金主席施榮忻、中華出入口商會副會長許華傑，以及立法會議員梁君彥公子梁宏正等。阿Rock會後話，大家有共識會關注更多80後、90後嘅發展，包括住屋、教育等需要。Maya就話，一班全青成員有意成立「師友計劃」，由佢哋擔任大哥哥、大姐姐，同時下大專生暢所欲言，薪火相傳喎。
霍啟剛（左） 同候任特首辦項目主任馮英倫（右）老友鬼鬼。