政壇：好打得林鄭血汗煉成

發展局局長林鄭月娥嘅「好打得」形象深入民心，仲盛傳係新一屆政府嘅政務司司長大熱，佢接受一個電視訪談節目訪問時自爆形象包裝秘技，原來佢嘅「好打得」形象來得「有血有汗」。立場強硬嘅林鄭，喺部分保育項目同新界鄉村僭建問題上都畀團體同村民針對，但佢一於企硬。唔講唔知，佢呢副硬骨頭嘅形象，深入到連一個抹汗嘅動作、一個接請願信嘅決定都要深思熟慮。

林鄭憶舊時，好自然提到五年前政府清拆皇后碼頭引起嘅軒然大波，呢件保育大事喺林鄭領銜發展局局長冇耐上演，皇后碼頭當時被大批保育人士佔據，佢親臨碼頭同大批抗議市民對話，深入虎穴已經夠勇，但林鄭話當時天氣好熱，佢其實出咗成身汗，但都冇抹過汗，點解﹖因為驚被傳媒鏡頭捕捉後，將佢抹汗嘅動作理解為抹眼淚就弊。所以，為咗唔落淚嘅企硬形象，林鄭寧願揮汗如雨。

唔流淚之外，林鄭亦遇到市民向佢呈上血書，佢話自己唔血腥，亦願意接收呢封信，不過負責維持秩序嘅警方就唔建議佢咁做，話怕群眾起哄喎，結果喺公眾眼中，林鄭嘅硬朗又深一層。

偏向保育多過發展

呢啲血汗洗禮，令林鄭愈嚟愈「打得」，咁佢對保育嘅立場又點呢？林鄭話，城市發展過程中，經常有聲音要求發展同保育取得平衡，佢自己偏向保育多過發展，因為以前香港嘅發展壓力大，但依家香港已經高度發展，花多啲精力喺保育上效果會更加好。

新政府組班風聲多多，林鄭更上一層樓嘅傳聞亦傳個不停，但佢對發展局嘅工作卻一啲都冇手軟，無論係新界村屋僭建，定係保育、重建等都好落力，唔通林鄭升官，主打都離唔開房屋、規劃？