僱主無良官冷血 最低工資如虛設

五一就快到，對打工仔嚟講，今年勞動節意義與別不同。點解？最低工資實施一年，打工仔薪酬及權益有冇得到保障，依家係時候檢討吓喇。

講都冇人信，今時今日仲有唔少打工仔完全得唔到最低工資嘅保障。呢，有位年過七旬嘅看更，每日晚八朝八做足十二粒鐘，時薪只得十三蚊二毫，連最低工資水平廿八蚊嘅一半都冇，你話淒唔淒涼吖！

捱更抵夜，年中無休，每月只搵得四千七百幾蚊，唔夠高官權貴開支紅酒；就算做足一年，總收入都未夠「離岸特首」煲呔曾外遊住一晚總統套房。叮，朱門酒肉臭，路有凍死骨，呢位老看更嘅遭遇，唔止係打工仔嘅悲哀，更加係港府嘅恥辱！

年逾古稀，本來應該頤養天年，點知因為生活所迫要繼續捱世界不特止，仲要畀無良僱主剝削，而且驚冇咗份工，只能夠啞忍。正如老人家話齋，「如果我去舉報即係等於自殺」，聽落真係心噏。

你話嘞，如果煲呔曾真係做好呢份工，順應民意設立全民退休保障制度，人人老有所依，老有所養，七十幾歲嘅老人家又使乜繼續做看更捱世界吖。

跛腳鴨政府安老政策徹底失敗，監管最低工資同樣失職。法例實施一年，居然仲有唔少僱主明目張膽剝削工人，呢位老看更嘅例子只係冰山一角嘅咋。有社區組織估計，因為上咗年紀同競爭力弱而被剋扣人工嘅打工仔，全港有過萬人。但奇怪嘅係，由法例實施到今年三月底，勞工處只發現一百零一宗懷疑短付最低工資個案，僱主被定罪嘅更只得十宗，最高刑罰亦只係罰款二萬五千蚊咁大把，擺明係監管不力喇。正如有人話齋，定罪個案同罰款額過低，根本起唔到阻嚇作用，檢控個案少，更令人懷疑當局執法放軟手腳。

叮！講起呢個涼薄政府，真係火都嚟埋。有調查顯示，最低工資實施後，包括醫管局、港鐵同多間大學在內嘅公營機構，都冇為清潔工人提供有薪飯鐘，唔少人月薪七千蚊都唔到。公營機構帶頭刻薄工人，港府關人個關，簡直匪夷所思！

最低工資形同虛設，打工仔權益毫無保障，而港府高官就一個二個捲入貪腐醜聞，市民唔嬲就假。咪話太一叮唔提醒吖，今年五一勞動節遊行，隨時變成「打工仔倒曾聲討會」o架，叮！