烽火台：曾兄弟交流遊埠經

巧合地，煲呔曾與鬍鬚曾兩兄弟前後腳遨遊南美，更巧合地，兩人一年前的對話絕密曝光。

煲呔曾：鬍鬚仔，最近你去南美遊埠，全程公帑埋單，做官係咪好過癮咁呢？

鬍鬚曾：係啊大哥，先飲智利紅酒，再睇森巴熱舞，啲巴西妹樣靚身材正，嘻嘻……

煲呔曾：咁正，我下年都要去一趟。係呢，益埋啲駐美手足，叫佢哋乘機南下探路，順便幫我訂埋酒店，我要住總統套房，president，yeah！

鬍鬚曾：咁搞法，條數咪好襟計？

煲呔曾：開講有話，浪費公帑，公帑梗係用嚟浪費㗎，家陣兩兄弟閂埋門講嘢，仲講乜鬼嘢以民為本啊，食懵你咩！

鬍鬚曾：但係我先去完你又去，食相難睇啲喎，到時畀記者問到你難堪、尷尬就唔好啦。

煲呔曾：到時我可以話，歐美經濟半死不活，高官必須頻頻外訪新興國家，感染吓快樂氣氛，唔係，為香港尋找商機至真。你知啦，明年為兄落台，無得免費遊埠咯，再唔去等幾時啊！

鬍鬚曾：正如同胞話，有權不濫，過期作廢，家陣事事都講中港融合，官員當然要同內地睇齊。

煲呔曾：今朝有酒今朝醉，今日有權今日濫，堅持濫用公帑，腐敗到最後一秒，哇哈哈……

以上內容純屬虛構，如有雷同不足為怪。