貪曾食相難睇 無謂繼續死撐

曾蔭權周遊列國，豪花五萬四千元入住總統套房嘅醜聞曝光後，除咗自己砌詞狡辯，仲搵班家臣出嚟死撐，可惜愈撐愈醜，愈描愈黑。唉，曾爵士有膽做冇膽認，乜架都丟晒喇！

呢，繼特首辦主任梁卓偉替煲呔曾受靶之後，港府駐美國總經濟貿易專員唐智強又出嚟護主。佢話喎，經貿辦兩次派人遠赴南美，為煲呔曾出訪打前站係有必要，已經好小心使用公帑。佢仲咁講，港府喺南美冇辦事處，而職員又唔識當地環境同語言，所以，雖然財政司司長曾俊華年前曾到訪有關國家，但當地官場有人事變動，需要重新探路喎。

叮！家臣護主心切可以理解，但死撐都要合理，有人相信至得o架。家陣資訊咁發達，要了解南美嘅情況，上網一查乜都一清二楚，使唔使兩次派人去探路吖？你以為登陸月球咩？講嚟講去，探路係假，遊埠就真，正所謂上行下效，煲呔曾假公濟私，佢嘅手下自然有樣學樣，反正唔使自己畀錢，唔去「探路」就笨囉。

仲有更搞笑o架，唐智強煞有介事澄清，經貿辦唔係唱空城計，當時仲有四個人留守華盛頓，而兩次探路總開支係八十六萬八千元，冇一百六十二萬元咁多喎。嗱，咁就叫做不打自招喇，呢啲錢本來就唔應該使，一百六十二萬又好，八十六萬八千又好，都係浪費公帑，家臣護主心切，點知愈描愈黑，簡直自暴其醜！

講開又講，煲呔曾貪威識食，有便宜貪到盡，醜聞又點只咁多吖。話口未完又多一單喇，舊年佢同胞弟曾蔭培暢遊惠州，坐嘅原來係本港某大地產商嘅「御用」旅遊巴，有「空軍一號」之稱，全部係超級豪華按摩座椅設計，仲有防彈玻璃添，「坐得舒適，玩得招積」，直頭係帝王式享受，點只總統咁簡單。係呢，煲呔曾今次有冇「按市場價格」支付車費？特首辦支支吾吾，含糊其詞，睇怕只有貪曾自己至知囉。

唔怪得煲呔曾口口聲聲「做好呢份工」喇，原來係要做好土皇帝。佢上台七年，無心施政，至叻就係假公濟私，黐飲黐食，周遊列國，臨落台都要「盡地一貪」，呢份工真係做得過o架。不過咁，人在做，天在看，咪以為土皇帝就可以隻手遮天，佢嘅所作所為既逃唔過天，亦逃唔過傳媒，遲早會有報應嘅，廉署杯咖啡等緊佢吖，叮！