on.cc 東方互動主頁

SUN世代：創業不離親兄弟

「我本來就乜都無，渾渾噩噩！」草根背景的廖錦興細說樸實童年。因為不甘平凡過一生，他年輕時決意博一鋪，在沒有家財萬貫做後盾下與兄長拍住上，赤手空拳開創塑料代理王國，為獅子山下的拚搏精神作完美示範。

廖錦興不是含着金鎖匙的幸運兒，但今日的成就不比他們遜色。他自小就活於生活艱難的水深火熱之中：「細個住屋邨，一家六口住喺好細嘅地方，放學咪打吓乒乓球，無咩特別娛樂，唔會有額外零用錢去玩。」

天生不是讀書材料，中學畢業後，無緣升上大學，他夾在踏出社會與留守校園之間。「我最終去半工讀管理學科，做過船務文員、銷售，當年唔算有咩特別理想，曾經去考警察，但考嗰日，有個交通警畀車撞死咗，屋企人打電話叫我唔好去考，所以無去到。」他娓娓道出香港青年典型的成長故事。

不過，年輕人總是有股莫名其妙的勇氣。九○年，廖錦興與兄長廖錦新鼓起勇氣創業。「我喺原料公司做過，了解多咗，覺得有發展空間，後來在學校老師啟發下，我與哥哥一齊創業。」他們的事業，是絕對的由無到有，他眼神帶點凌厲道：「我最初真係乜都無，無錢、無人脈、無背景，但我哋勤力！」

要成功先打工

他的勤力足以讓人佩服。「當年由朝早七點做到凌晨一點，一個人去拜訪內地深圳、東莞嘅廠商，希望佢哋畀機會我，有人覺得出奇，亦有人欣賞我嘅勤力。」最終，部分客人願意以行動支持他：「我老實同啲客講我無錢，要佢哋先畀錢我，然後我喺外國幫佢哋訂貨，好彩都有人肯！」他終於建立了自家的銷售和工程師團隊，公司漸漸成形。

現時他的業務遍及中港，在東莞、廣州、上海、天津、青島及長春，甚至遠至成都也有辦事處。名利雙收的他，更在○九年當選香港青年工業家獎。此後，其成功故事漸漸流傳，屢獲邀請到城大、港大、浸大及公開大學等演講，分享成功之道。

不少學生都希望偷師，倒模成功人生。「佢哋最鍾意問我，大學畢業後可以點樣創業？」他總是不如學生所願，拋出一系列輕鬆致勝之道，而是：「你要出去打工！」他說成功不外乎機遇、準備、勤力和決心，更重要的是經歷：「成功創業家唔會唔打工！要畀老闆鬧吓，碰吓釘，學識做一門生意要顧及市場、人事、管理等問題！」萬丈高樓從地起，話雖老土卻真實。