政壇：政商定格：老夫子潮Look破格迎50歲
老夫子明年五十歲生日，作者王澤童心未泯，近日為老夫子脫下長衫馬褂，改穿名牌，究竟係王澤世俗咗抑或係要迎合90後嘅口味？佢堅定咁話：「老夫子毋須為迎合讀者口味而改變，變潮，係一個Surprise（驚喜）！」
畫展六月二十三號喺趙世光千金Jane趙式和旗下畫廊舉行。今次新作多達五十幅，通通打破四格、六格漫畫嘅傳統，破格注入時尚元素。一個穿Gucci拉二胡、着D&G行街嘅「新老夫子」，作風大變，王澤話係無心插柳：「有次被台灣時尚名牌邀請，以老夫子漫畫來演繹佢哋嘅新裝，一試下大叫過癮。」但王澤強調，變潮不是為討年輕讀者歡心。近年來，王澤喺台灣定居，今次難得與「粉絲」見面。
熱愛藝術嘅趙式和（左）全力支持王澤（右）六月來港開畫展。
老夫子穿上Prada皮褸，變身潮人。