政壇：迫遷工展會康文署犯眾憎
喺維園舉行嘅工展會早已成為市民嘅集體回憶，但繼舊年康文署擬大幅加租，想將工展會迫遷去山長水遠嘅機場博覽館後，今年康文署又再出招，打算將工展會迫遷到舊啟德機場空地舉行，結果又惹來風波。
據聞康文署嘅迫遷理由，係回應有區議員轉介市民投訴，指長達二十幾日嘅工展會減少區內市民嘅活動空間。無端端接咗個燙手山芋嘅東區區議會，日前就通過支持工展會繼續喺維園舉行，即刻將個波踢番畀康文署。
話時話，如果康文署堅持迫遷工展會，分分鐘陷候任特首CY梁振英於不義，事關工展會係由中華廠商聯合會旗下公司主辦，而廠商會十幾名選委都係唐唐嘅支持者，若年底工展會告別維園，仲唔畀人話CY秋後算帳咩？
康文署連番意圖踢工展會出維園，結果東區區議會決議要求保留。（資料圖片）