政壇：CY拒執煲呔曾手尾
早前有疑似係民政事務總署中人唔妥該署庸官當道，把心一橫去信要求候任特首CY梁振英跟進。一直堅持六月底前香港只有一個政府、一套政策嘅CY，日前就透過下屬代勞，強調自己無權處理呢個問題，仲將回信副本一併送到現屆特首辦，暗示要現屆政府執好自己嘅「蘇州屎」。
先簡單講番封投訴信內容，實情係投訴庸官俯拾皆是嘅民政事務總署，上至署長「騰雞美華」陳甘美華，下至起碼兩位民政事務專員，佢哋寄居民政署九年至二十四年不等，打破晒政務官一般每三、四年調遷一次嘅常規，質疑呢啲官員能力到底有幾好。投訴人起初並冇將問題反映畀煲呔曾知，擺明就唔放現屆政府在眼內，咁做其實好正常，試問邊個仲對夕陽政府有期望吖？CY秘書將問題交番畀煲呔曾，實在合情合理。