社福撥款諗縮數 悲情城市更悲情

曾蔭權講過福為民開，相信好多香港人都唔記得咯，包括佢自己。咁又難怪嘅，一個只係識得傍住富豪黐飲黐食黐大屋嘅貪腐特首，仲邊理得市民幸唔幸福吖，當市民係阿福就真，叮！

嗱，煲呔曾政府有冇真心關顧市民，講多無謂，睇吓一班蟻民嘅處境就知嘞。

呢班蟻民就係「悲情城市」天水圍嘅男居民。具體啲講，係「天北男士」計劃嘅二百名男會員。「天北男士」係乜東東？大家知啦，天水圍失業嚴重，公益金撥款資助一個以幫助區內男士為宗旨嘅試驗計劃，取名「天北男士」。會員阿琚係咁講嘅，計劃畀班同病相憐嘅男人互相交流，唔止擴闊生活圈子，更加可以宣洩內心鬱結，冇錢搬屋又有人幫手，慳番好多支出。

好明顯，計劃幫到天水圍居民。可惜好景不常，計劃喺前年七月壽終正寢，原因係公益金唔再撥款資助，唔少會員失去支援打回原形，繼續自閉，繼續悲情。

除咗「天北男士」計劃之外，上門輔導隱蔽青年嘅「藍天計劃」亦可能遭遇同一命運。呢個計劃本來好切合當前社會需要，引導患上社交恐懼症嘅宅男宅女走出家門融入社會。計劃將喺八月底結束，負責人打定輸數，不再獲私人機構撥款資助。

好嘞，太一叮講咗咁耐，天水圍居民自生自滅，隱蔽青年失去輔導機會，關煲呔曾乜嘢事呢？嗱，社福界踢爆，講嚟講去禍因就係政府諗縮數，將呢類試驗計劃推晒畀私人機構，然後就關人個關。私人機構無義務長期資助同一個計劃，咁咪令到救人助人服務無以為繼，搞到弱勢社群求助無門囉。所以話啫，煲呔曾講福為民開，七年嘞，都係大隻講咋，市民失業、劏房危機、老無所依、孕婦生無床位……佢全部話之你！

嗱，社福界就一語中的嘞，港府根本一開始就有責任為試驗計劃提供撥款，家陣將責任卸晒畀私人機構，反映一個好清楚嘅事實，所謂嘅扶貧政策只係得個樣。

叮佢個鎯鎯，早前國際機構調查顯示，香港七個市民一個痛苦，家陣大家知原因啦，就係煲呔曾七年來都冇做好份工。嗱，佢好快就收工嘞，大家記住搵佢算帳呀！