SUN微博：打橫嚟講：叻仔唔做官

舊時，喺封建社會，能攫取一官半職，便敲鑼打鼓，坐八人大轎，抬到祠堂祭祖還神，仲驚死無人知，要燒鞭炮五丈，擺盆菜五百，光耀門楣。

啊！家陣？就冚家鈴囉！無咗上述嗰支歌仔唱久矣！現今「做官」，只是打份「政府工」，一個「公僕」（傭人）而已！除非係特首欽點的「非公務員」身份那班薪高智弱嘅低能「政治問責官員」，否則，點會咁梳乎！毋須孭責兼唔廢唔請！

都唔明，何解仲有人咁鍾意做官，貪成日畀人鬧、鬧埋老母、祖宗十八代好咩？畀人跟、畀人起底，連累埋隔籬屋三嬸九叔好咩？人工又唔高，一舉一動都要向上面交代，打個「乞嗤」，都須政治正確呢！官府內部的爭鬥，從辦公室鬥到社會市面，又由出面鍊到返總部裏面，每分每秒每個角落，無不在拉鋸中，做得耐，心理不平衡才是正常的，變態就更預咗o架啦！所以，不少與香港政府官員交過手的人皆說那批官僚全是垃圾（仲係固體嗰隻），說話可能重咗啲，但也精準！

真係戥梁振英慘，當選一個月啦！新班子都未湊齊腳同話得畀人知！可見前朝的問責官員幾廢，不能揀得落手。唉！唔通又想見傻強（搞經濟的）、騰雞華（環保的）、一鑊（跪地的）、公公（錄音的）、錦樑（Show卡片的）一群騎呢怪替香港作主？

由呢班港人治港，呢度點會唔死吖？難怪嘅！俗語有話：「好仔唔當差，叻仔唔做官。」剩下的，唔殘都廢也！你做埋我份啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係咁爆」網址：tv.on.cc/hot