政壇：搞搞政：陳祖澤：退出江湖廿幾年

政圈頻傳大和解之風，高層人士聚頭，好容易惹嚟風吹草動，一堆政界人士尋日不約而同喺中環一食肆聚腳，久別官場嘅前馬會主席陳祖澤（John）又喺附近出現，老於政途嘅阿John會唔會出山呢？阿John一聽我哋嘅問題，擰頭一笑，爽朗咁回應：「我都退出江湖二十幾年喇！」

港英年代叱咤政圈嘅阿John，對香港局勢同埋政府運作好熟悉，候任特首梁振英正需要呢方面人才喎，所以大家繼續向當事人發功，但阿John都係一副退隱江湖、風清雲淡嘅樣。諗真啲，佢呢句答咗等於冇答，事關佢從政府退休嘅年期稍為查吓就知道，但退休幾耐同會唔會再入政府冇任何關係噃，難怪人哋話薑係老嘅辣！

睇番阿John自政府退休後，一陣喺九巴打逍遙工，一陣又寄興趣於工作，喺馬會主席任上又做慈善工作、發揮管理專長，同時又可以同太太笑傲綠茵場，話佢笑傲江湖真係冇錯o架！