政壇：張茵家族基金變動股民慌
民企風暴令股民心驚驚，遇到上市公司董事跳船、核數師辭職、股東減持，都會當負面消息睇。尋日民企龍頭之一嘅玖龍紙業就傳虛驚，事關股權披露顯示，有兩個股東嘅持股量突然由超過六成降到零，引嚟係咪有人掟貨走人嘅疑慮，玖紙副總經理吳國勛即刻派定心丸，話純粹係家族基金安排變動啫。
吳國勛解釋兩個股東嘅背景，佢話The Northern Trust Company of Delaware其實係玖紙主席張茵家族成立嘅一個信託，持股係幫張茵家族揸嘅；而另一股東Zhang Xiujie就係張茵家族入面嘅人，亦都係呢個信託嘅信託人，而佢哋嘅持股變零，只係因為家族信託內部進行重組架構，而家族嘅總持股量，就並冇任何改變，亦都唔存在掟貨事件喎。
玖紙股權尋日惹虛驚，原來係張茵家族基金作調整。 （資料圖片）