政壇：林健鋒人肉發電稱王
經濟動力召集人林健鋒（Jeffrey）尋日技驚四座，佢出席中電一個活動時，同總裁藍凌志一齊鬥玩中電自行研發具發電功能嘅「踏步發電機」，兩人鬥發電多少，估唔到Jeffrey竟然贏成條街，榮膺「原地踏步王」。
呢部踏步發電機只要有人企喺上面，不停踏步就可以發電，Jeffrey同藍凌志行咗四十秒已經分出勝負，藍凌志只係發到0.5瓦時電，但Jeffrey就發到0.9瓦時電，即係多出差唔多一倍。根據中電提供嘅資料，只要喺發電機上踏步三十至四十秒，就可產生相等於手機通話一小時嘅電力。呢部機如果擺喺立法會都好喎，啲議員「原地踏步」下，分分鐘唔使交電費！
雖然「踏步發電機」係中電發明，但總裁藍凌志都唔夠林健鋒（圖）原地踏步咁犀利。