政壇：政協常委傳唐唐中「安慰獎」

中央政府不時用人大、政協位置統戰親中人士，適逢明年人大政協換屆，最少有三名政協常委因不同原因退下來騰出空缺，據聞多名親中人士已磨拳擦掌「搶位」。有政圈中人估計，政商界正吹「大和解」之風，喺特首選舉落敗嘅唐英年料獲政協常委「安慰獎」，一切視乎唐唐係咪接受。至於另外兩個政協常委空缺，政圈盛傳由多名親中社團嘅政協瓜分。

政圈中人指出，候任特首梁振英如無意外會辭去政協常委，專心做好特首工作，而正被廉署調查嘅前政務司司長許仕仁，因為醜聞纏身亦預料好大機會自行求去，連同早年逝世嘅徐展堂，形成今次至少有三名政協常委出缺嘅局面。據聞其中一個政協常委空缺已經「名花有主」，就係曾喺政府服務咗九年嘅唐唐，呢邊失意特首之戰，嗰邊攬番個「安慰獎」都好呀。

捐錢多「有貢獻」易上位

至於另外兩個政協常委嘅空缺，估計最少有五人有意爭奪，包括恒基地產主席「四叔」李兆基嘅長子李家傑、「福建幫」林樹哲、廣東社團總會主席王國強、中華總商會會長蔡冠深及「牛仔褲大王」楊釗。

其實，中央挑選政協常委好多時睇有關人選過去對內地有否「有形」或「無形」嘅貢獻，例如捐錢捐得多嘅自然評定為「有貢獻」，機會自然大好多，相對於一啲財力唔夠、一直默默耕耘嘅親中人士只能望門興嘆，現實就係咁喇！