政壇：邱騰華歐遊焚化公帑

煲呔曾領導嘅夕陽政府踏入倒數後期，但佢哋嘅公費外遊就愈嚟愈密，啱啱我哋先講過財爺鬍鬚曾緊接煲呔曾無縫外訪之後，啱啱喺焚化爐事件上衰咗嘅環境局局長邱騰華，尋日又以焚化爐之名出訪，今次係去歐洲三國一個禮拜。本港社會對焚化爐有好大意見，政府高官卻話之你，一於你有你反對，我有我取經。其實，邱騰華任期只剩兩個零月，以佢嘅表現留低機會真係令人存疑，如果係咁，今次訪問除咗嘥錢畀佢刻個「到此一遊」嘅記號，仲有乜用呢？

立法會環境事務委員會前幾日先開會，否決撥款一百五十億元興建垃圾焚化爐，邱騰華好明顯未死心，為要說服大眾「除非」有神仙棒變走垃圾，否則起焚化爐事在必行，佢尋日就專登帶埋新聞秘書同政治助理出發去咗童話之父安徒生嘅故鄉丹麥哥本哈根，話就係睇焚化爐同回收站，但以佢嘅政治能量，能夠搞掂立法會嘅機會真係唔高，或者幻想喺童話聖地搵支神仙棒好過。

蘇錦樑遇雷雨棄上京

除咗丹麥哥本哈根，邱騰華今次仲會去瑞典，尾站再去埋英國，話要發掘環保經濟合作機遇，拓展香港和珠三角的綠色技術市場喎。其實邱騰華都唔係第一次去哥本哈根，早喺○九年佢就曾經代表香港參加哥本哈根氣候首腦峰會，不過當時就畀環保團體話佢去做騷，今次邱騰華喺任期餘下兩個月故地重遊，又睇吓搵到乜機遇？

貪曾早排以搵發展與合作機會走遍南半球，邱騰華今次又藉「搵商機」為名歐遊，呢啲算唔算上樑不正下樑歪呢？講開問責官員外訪，尋日商務及經濟發展局局長蘇錦樑本嚟要上北京訪問，點知雷雨影響，搞到航班嚴重延誤，最終蘇錦樑要取消行程。