地質公園百無 官僚唔識脫角

跛腳鴨治港，幾騎呢都有。世界級地質公園之旅，變成荒島一日遊，遊客隨時捱飢抵渴，乘興而去，落荒而逃，簡直係宇宙級笑話！

話說東平洲舊年升呢為世界級地質公園，即刻變成旅遊熱點，每逢周末假日都有數以千計遊客登島，一睹地質奇觀。只可惜，希望愈大，失望愈大，所謂世界級地質公園，根本就係一個「百無」嘅荒島。講都冇人信，島上莫講食肆，甚至連一間士多都搵唔到，如果遊客冇帶備足夠糧水，東平洲之旅直頭係飢渴交迫嘅噩夢。呢，試過有遊客一家幾口去玩，小朋友餓到實在頂唔順，父母愛子心切，焗住使成千蚊包船離開；更有遊客餓到要報警求助，問你服未！

唔係啩？地處香港呢個所謂亞洲國際都會嘅世界級地質公園，配套設施居然連第三世界國家都不如，仲有冇丟架啲吖！其實，島上原本有三間士多，自從升呢為世界級地質公園，食環署、消防處甚至連稅務局、牌照事務處等部門都忽然勤力，輪番嚟「冚檔」，咁搞法，士多唔拉閘至奇喇，叮！

東平洲淪為「百無」荒島，遊客冇啖好食，始作俑者居然係跛腳鴨政府，簡直令人難以置信。有士多東主十年前曾向食環署申請食肆牌照，當局話東平洲無水無電無通訊設備，唔符合發牌條件喎 。即係話，就算喺島上出售一包餅乾、一樽水，都屬「違例經營」，你話有乜法子唔變成荒島吖。

所以話，呢個政府冇其他本事，最叻就係墨守成規，一成不變。香港難得出咗個世界級地質公園，本來可以成為旅遊業生招牌，弊在嗰班僵化嘅官僚捉到鹿唔識脫角，搞到遊客走夾唔抖，咁唔只係趕客，直頭係倒米。

講開又講，旅遊業係本港四大經濟支柱之一，由於自然條件等限制，景點本來已經唔多，再畀港府咁糟蹋，更加買少見少。當局口口聲聲發展旅遊，弊在一味齋噏等運到，講就天下無敵，做就無能為力，好多項目唔係無疾而終，就係虎頭蛇尾。嗱，漁人碼頭胎死腹中，單車徑好似斷橛禾蟲，昂坪纜車故障頻頻吊吊揈……蝦碌嘢十隻手指數唔晒。

叮佢個鎯鎯！太一叮想問吓班官僚，你哋既無能又無腦，該做嘅唔做，唔該做嘅就亂嚟，沉香當廢柴，地質公園淪為荒島，咁算係做好呢份工咩！