政壇：搞搞政：兒時鍾庭耀最愛數星星

小時候，人人都有一個或幾個夢想，港大民意研究計劃總監鍾庭耀細個嘅志願卻係做太空人，或者天文學家，細個瞓覺前更鍾意數星星添，可惜，佢大個揀咗社會科學，仲專職數人頭添，不過，亦因為數人頭嘅民調研究搞出大風波，煩惱不斷，睇嚟數人頭真係唔及數星星開心。

鍾庭耀尋日出席一項頒獎活動，罕有咁同台下嘉賓分享兒時往事，雖然細個鍾意數星星，但佢長大後卻發現香港不但冇可能培育到太空人，甚至唔係一個適合讀天文學嘅地方，所以兒時嘅夢想就係咁先。不過，鍾庭耀講起依家嘅工作卻又忍唔住自嘲，佢話○○年嘅龍年，佢惹出單特首辦特別助理路祥安干預特首民調風波，今年又逢龍年，卻又爆出中聯辦宣傳文體部部長郝鐵川批評佢嘅港人身份認同調查事件，十二年一個麻煩周期，好準o架。

講番九月立法會選舉，過往每次大型選舉，港大民調都會做票站調查，不過鍾庭耀尋日話，由於政府拒絕修例加強規管票站調查，縱容政黨假借學術之名收集市民投票取向，港大民調可能杯葛九月做民調，鍾庭耀嘅龍年煩惱似乎未完噃。