政壇：CY撐美而廉自己埋單
候任特首梁振英（CY）係出咗名嘅工作狂，不過，籌組新班子之餘，佢都盡量抽時間陪太座，尋晚特登叫司機接梁太去候任辦，然後兩公婆一齊到大角咀塘尾道重開嘅老字號「美而廉餐廳」撐枱腳，佢哋兩夫妻之前幾次食飯都係一百幾十蚊落樓，尋日叫咗個鐵板扒餐、蛋白炒飯同兩杯飲品，盛惠一百二十八元。老闆本來話請CY，但CY就耍手擰頭，最後仲畀咗一百四十元唔使找。
巧合嘅係，尋日係間餐廳搬遷後重新開張，CY同梁太抵達餐廳時已經有成二十人排緊隊輪後，最後佢哋搵咗個卡位坐低。唔少食客見到CY夫婦，都好熱情同佢哋合照留念。除咗同老公去街，梁太唐青儀前日下午四點幾，佢就行街「血拚」後同一位女友人喺中環置地廣場一間餐廳歎下午茶。
梁振英（左二）同太太到搬遷後嘅美而廉餐廳鋸扒撐枱腳。