政壇：建仔少壯派隨時造反

九月立會選舉係加席位後嘅首場大戰，好多細黨派樁腳唔夠，想爭議席都好難，相反好多樁腳嘅民建聯卻爆出第二梯隊為出選爭崩頭嘅事，一班具潛質嘅年輕黨員因為黨內元老唔肯退位讓賢，等咗四年又四年，好似該黨北區區議員劉國勳，又或者係黨副主席張國鈞等，都係苦無出頭天，好易內訌o架。

劉國勳話晒都係區議會選舉嘅「票王」，喺地區實力雄厚，但立法會嘅新界東選舉，佢同沙田區議員葛珮帆（EQ）都有意出選，葛係副主席劉江華愛將之一，最近仲有傳葛珮帆已經贏咗出線權。咁劉國勳可唔可以改循區議會功能組別出選呢？預計呢個議席又會被葉國謙霸住。

新界東有麻煩，新界西一樣有新舊矛盾，一直選開九龍西嘅李慧琼轉戰超級區議會已經通晒天，張國鈞被傳好大可能循呢區出，點知又傳畀人截胡，因為建仔有意安排即將離任嘅發展局政治助理張文韜空降九龍西參選，傳聞仲話，呢個決定多得曾鈺成一錘定音哦。