政壇：邱騰華博留低要偷橋

候任特首梁振英去到邊，手上都拎住佢個用咗三十幾年嘅皮製公事包「梁皮包」，尋日佢又拎住個梁皮包落立法會出席聆訊，事後仲成為佢同議員溝通嘅焦點添，有議員好奇咁問CY，係咪真係用咗梁皮包三十幾年，仲似講笑又似認真咁話，CY咁環保，第日嘅環境局局長咪好有壓力，因為佢只可以用舊嘢！雖然唔知第日邊個做環境局局長，但啱啱先喺焚化爐事件上趴低嘅邱騰華，唔知會唔會從中悟到條博留低好橋呢？

CY個梁皮包喺競選期間已經大出風頭，尋日又被議員議論一番，有意進身CY新班子嘅候選官員真係有必要留心吓。因為有議員認為環境局局長既然管環保，佢嘅頂頭上司CY都用緊三十年前嘅公事包，環境局局長都唔應該違反啩。呢條算唔算梁治潛規則呢？

嫻姐話唔係「保梁局」

新政府嘅環境局局長誰屬，家吓仲係未知之數，現任局長邱騰華嘅表現係人都知，由慳電膽、空氣污染、堆填區到焚花爐，佢衰咗一鑊又一鑊，已經被政圈傳為列入冇得留低嘅官員之一，睇佢平時口若懸河宣傳環保就叻，想搵件好似CY隻梁皮包嘅代表作就似乎冇囉，或者政治能量偏低嘅邱騰華應該即刻返屋企，摷件家族傳統嘢出嚟襯吓，博留低或改官運都好呀嘛。

講到特首選舉，至今落幕一月餘，城中除咗多咗梁營、梁粉之稱外，工聯會陳婉嫻尋日出席另一場合時，又被戲稱為「保梁局主席」，搞到佢鬼咁尷尬。嫻姐事後話，自己從來無做過「保梁局」嘅角色，只係好耐之前，當社會大部分人覺得唐英年做硬特首嘅時候，佢力排眾議有第二種意見，所以先畀人有呢種錯覺。