SUN微博：網絡小說： 關於入冊，長毛想說的是……

其實，入去之前，我最想買支護髮素。大家都知道我由一個托洛茨基主義者蛻變成社會民主主義者，除非唔知；但大家一定唔知，我幾咁在意同呵護我把秀髮。就如呻吟黨Reginababy教落，我連自己髮型都捍衞唔到，仲點捍衞香港法治。正因為咁樣，我爭取髮型自主，為佢申請司法覆核，同樣都係捍衞「髮自」。

不過，好多基層人士唔係好理解我嘅行為，成日覺得長毛呢個名後面，一定要加個賊字。Come on！長毛賊係清廷用嚟鬧鬼班太平天國嘅友仔，即係擸起鋤頭去隊冧個不該皇帝嗰班農民喎。大佬！你咁係讚緊我呀，OK？

或者西報叫我Long Hair，同我本人更加貼切。Long Hair，唔止頭髮，連體毛都長過人，極之粗獷。咁樣正好反映到我天真純樸，不畏強權之風範。就好似衝替補機制論壇呢啲小事，邊及我踢波一味夠衝，就如電影《戰狼300》中大叫「This is not Spartas！」同樣咁man？

有人叫我入到去小心啲，唔好用番梘洗頭，跌咗要小心啲執，因住招致不堪設想嘅後果（即跌親）。我當然好多謝佢哋嘅忠告，但係其實我早就知番梘傷髮，一直打死都唔用，所以我諗緊點偷運古法秘方中草藥霸王洗髮露入去，令我監獄生活動L少少。

又有人同我講，買支護髮素，其實唔難。但係要我去大商場買？咁咪即係益晒大財團！去藥房買，咪又益領匯？講到我反對大財團嘅決心，以下不如引一下陳獨秀，以明心志：

「行無愧怍心常坦　身處艱難氣若虹」

對唔住，喺引詩嘅時候，我啱啱去補咗一飛。你知啦，監倉唔係咁隨便可以食煙，出來放風先食得幾支，仲要喺最佳溫度45度下食，長頭髮會好辛苦。咁查實好多偉大政治家，即係唔係煲呔曾嗰種，都坐過監，但係好似甘地嗰啲光頭仔，又邊度會理解我嘅煩惱。

佛家雖話三千煩惱絲，之但係人皆煩惱，剪咗都係煩，不如做個浪子，爭一日之長短。一句到尾，世界革命之前我會恤個靚髮，在晴朗的一天，向世界恤髮！

四月二十一日

書於赤柱監獄門口

代筆：長槍鳴

幾許瘋語

黑社會收陀地都係收錢啫，你直情要埋塊地，咪仲惡過黑社會?你好彩，香港唔興「唱紅打黑」，唔係你一定畀人鬥地主咁鬥呀!