政壇：張宇人議席兩面受敵
立法會飲食界功能組別議席一向係富貴黨嘅橋頭堡，但九月嘅選情卻可能變天，有消息話，挺梁嘅餐飲聯業協會會長黃家和同民建聯大埔區議員鄭俊平都對呢個界別磨拳擦掌，後者仲提早落區熱身添，下周二率先召集各界友好做選民登記，富貴黨副主席張宇人（Tommy）今次勢兩面受敵。
過去Tommy喺界別中都係輕鬆連任，去年底，特首選舉委員會選舉推薦嘅十七人名單亦全數勝出。
有銳意打破Tommy壟斷飲食界嘅政界中人就獻計話，黃家和同鄭俊平各自有一定實力，倘二人經協調後聯手出擊，或者會收到意想不到嘅效果喎，唔知黃、鄭二人係咪會認真考慮吓呢個建議呢？
尋日我哋講過富貴黨疑爆退黨潮，李子良就強調「絕無退黨之意」，而丁午壽亦發表聲明話，自己同黨關係良好，絕無諗過退出該黨同動搖過對黨嘅支持喎。