政壇：曾兄弟輪住公費遊

已淪為跛腳班子嘅夕陽政府，由煲呔曾到唔少問責官員都一副心不在焉、等緊早抖嘅樣，煲呔曾啱啱結束放假同外遊嘅漫長之旅，但佢前腳返香港，佢嘅曾兄弟鬍鬚曾又接棒外遊，今次鬍鬚曾揀咗去東南亞三國七日，使費雖然冇煲呔曾咁勁，不過，喺政府換屆嘅關鍵時刻，政府高層就頻頻外遊，孖曾兄弟更咁啱咁蹺無縫離岸，試問人影都冇，新舊兩屆政府點樣好似煲呔曾所講咁無縫交班呀？

七日訪東南亞三國

政府憲報尋日率先刊登鬍鬚曾離岸外訪嘅訊息，傳媒查詢之下，新聞處又急急喺下晝補發新聞稿，宣布鬍鬚曾嘅離岸七日行程，佢明日起至二十八日，先後出訪越南、馬來西亞同泰國，期間嘅例牌動作係會晤當地高層官員，出席貿發局舉行嘅午餐會，以及喺泰國曼谷主持香港電影節首映禮等，呢啲活動無咩特別，全程對香港經濟有影響嘅，可能係同馬來西亞政府簽署全面性避免雙重徵稅協定。

點都好，鬍鬚曾因為呢一行需要離港七日，等佢返香港時，眨吓眼又到五月，交接工作嘅時間又少一個月喇。雖然鬍鬚曾呢一程使嘅公帑比起煲呔曾嗰一程差好遠，但了解內情嘅人都知道，鬍鬚曾上任以來開口埋口都係提升香港金融中心競爭力，可惜喺○七年至今，本嚟應該一早就要做嘅避免雙重徵稅協定，居然拖到任期最後兩個幾月，佢先走去同馬來西亞簽署，算唔算趕尾車呢？

不過，公眾最關心嘅係，煲呔曾等執包袱，樣樣事放軟手腳，搞到候任梁振英要喺佢周遊列國時，自行出招「喝停」明年私家醫院「雙非」配額，依家一個返埋位，作為政府大掌櫃嘅鬍鬚曾又要飛嘞，咁樣嘅無縫交接工作，真係令人耳目一新囉！