蒲台變千墓島 香港幾奇都有

千島湖喺浙江，千島之國係印尼，原來香港都唔輸蝕o架，同樣有地理奇觀，叫做「千墓島」。

聽落好似好恐怖咁，其實千墓島就係素有「香港南極」之稱嘅蒲台島，本來係風景怡人嘅，不過依家就唔同咯。本報早排踢爆，島上多個山頭樹林被夷平，鋪上過千塊三呎乘三呎嘅石屎板，懷疑有人違規興建墓園。「香港南極」淪為骨灰龕場，曾蔭權政府管治下嘅香港，真係幾騎呢都有。

千墓島曝光後，當局拍晒心口話會跟進，城規會仲急急腳補鑊，將蒲台島納入法定規劃管制範圍添，點知做完騷就冇晒下文。呢嗱，依家過咗兩個月喇，涉嫌違規工程不但如常進行，仲搞埋綠化，呢度種樹，嗰度鋪草，好似奉旨咁，早排仲有人喺島上摸黑進行神秘法事添，問你服未！

唔使問阿貴，蒲台勝景淪為千墓島，港府監管失職難辭其咎。本港骨灰龕位長期供不應求，市民輪候公營龕位望穿秋水，導致無牌私營骨灰龕場遍地開花。查實除咗蒲台島，全港唔少地方都發現違規興建骨灰龕場，但當局詐傻扮懵，一味玩拖字訣。正如有立法會議員話齋，煲呔曾唔單止想將個波留番畀下屆政府，仲由得佢愈滾愈大，變成火球先交波。

公營龕位短缺關人個關，無牌龕位氾濫闊佬懶理，其實呢啲只不過係冰山一角嘅咋，煲呔曾留畀下屆政府嘅計時炸彈，簡直數都數不清。佢治港七年，自私縮骨，毫無建樹，在其位不謀其政，淨係顧住黐實富商攞着數，懶理社會危機四伏。呢，逼爆醫院產房嘅雙非孕婦、搖搖欲墜嘅違規招牌、危機四伏嘅劏房、隨時引發官民衝突嘅僭建村屋，試問邊樣唔係一觸即發嘅計時炸彈？

煲呔曾仲有兩個幾月就夠鐘收皮，呢個「離岸特首」遊完埠返港，啱啱落機就死撐話夕陽政府唔係跛腳鴨喎。計太一叮話齋，煲呔曾治港七國咁亂，無論政治經濟定社會民生，統統搞到一鑊泡，嚴格嚟講，呢個政府連跛腳鴨都不如，直頭係死鴨一隻，叮！